Sunday, September 24, 2006

مكنتش اتصور !!

في يوم زي أي يوم ...ما تعرفش ايه سر النشاط الي خلاك تقوم بدري الساعه 9 علي غير عادتك الموخمة ...تحس بجد ان اليوم دا واضح انه مختلف، وهيبقي مليان بهاليز !!!
دا بالظبط الي حصل لي ...يوم الاتنين الي فات، صاحية في آمان الله، وكعادة كل الناس المدمنيين الي زي اول حاجة بيعملوها الشاي والكمبيوتر بيتفتح
اول ما فتحت الماسنجر واتكلمت ...عرفت انا ليه صحيت بدري النهاردة
عشان يجي حد بكل بساطة يقلب عليك سنة كاملة ويفكرك بكل حاجة عانيت منها ...ويقولك أنا آسف
حقيقي تشكر أيها الحد ...بجد ثانكس كتتتتير...عارفة انك بذلت مجهود كبير عشان تقولها ..عارفة انها خدت تفكير منك كبير
بس انا عاوزة أقول حاجة ...آسف مش آسف فالاتنين عندي واحد...لأني الحقيقة مش بزراير بكلمة أنسي كل الي فات
آه لو تعرف أيها الحد انا ساعتها كنت حاسه اني تعبانة ازاي ...
بس الي الله يكون ربه عمره ما يتعب أبدا ....سبحااااانك ربي
علي الرغم من آسفي وحزني علي تذكر سنة من احتراقات في الاعصاب بشكل مستمر الا ان اليوم انتهي بأبتساااامة عريضة علي وشي ...واني كنت ماشية في الشارع زي الهبلة الي مسكوها طبلة بالظبط من كتر فرحتي ان أخيرا ...الصورة أكتملت
وبمناسبة أكتمال الصورة، أحب انزل حاجة صغيرة اوي كنت كاتباها زمان تقولوش قلبي حاسس !!
أتذكرك دوما ..حين تتساقط الاقنعة
فأنت أول من أثقلت الذاكرة بلحظات سقوطها
كم كانت قاسية ...مؤلمة
أتذكرها فترتخي الأعصاب...وترتعش الاطراف ويتوقف التنفس
كأول مرة فيها تجردت من ملابسك التنكرية
كأول مرة فيها رايتك كما انت
كم هو مفجع ان تكتشف أنك أخطأت الاختيار
وبس بس ...خلص اليوم بأنهيارات جماعية ...وانتصارات جماعية
ملحوظة: عندي شعور انكم مش هتفهموا حاجة ...محلش أصله هو اصلا موضوع مش مفهوم

يا أهلا بالصداااع

ياااااااااااه بقالي زمن ما رغتش ع البتاع دا، وبجد تعليق كلمة هو الي فكرني، أني بقالي زمن ما قولتش اي حاجة في أي بطيخ ان شالله حتي انا طبخت ايه النهاردة، الغريب ان الموضوع مش ناتج عن عن عدم وجود اي جديد...او فراغ في الاحداث، لكن انا فعلا كنت واصلة لمرحلة اني مش عاوزة أتكلم، وكفاية اوي عليا 20 سنة عمالة اتكلم
مش عارفة ..كنت حاسه اني في تحدي بيني وبين نفسي ..أنا مش هتكلم أنا هسكت ...مش هحكي، مش هقول حاجة عن أي حاجة ...الموضوع كان صعب اوي في الاول وفعلا مكنتش بحكي ...الا لما حد يسألني طبعا ( يعني اخلي فضولهم يقتلهم)...بيني وبينكم كنت ببقي مستنية سؤالهم
كنت ببقي مستنية مكالمة من عجبي عشان تقولي ازيك يا بطوطة ونعد نرغي بالساعه ع التيلفون لحد ما أبويا او أبوها يعلنوا صفارات الانذار، ياما كنت بستني ايميل من عائشة عشان تعبر أم الي جابوني وتقولي حياتها عاملة ازاى وهي فين دلوقتي في إطار جولاتها المكوكية في مصر!!
بس الحمد لله ...هما كانوا بيسألوا ....وزياااادة الحقيقة
ما علينا من كل دا ...الفكرة اني بقي قررت اني أكتب بقي عن كل حاجة حصلت لي طول الاسبوعين الي فاتوا دول ...هصدعكووووووووووووا ...هصدعكوا من هنا لحد رمسيس ...وعشان يا كلمة ما تبقاش تتبطر ع النعمة الي انت فيها :D


انتظروني !!!

Sunday, September 03, 2006

وساد الصمت البليغ





















.......