خير..اللهم اجلعه خير

انا فعليا مش عارفة انا صاحية ولا نايمة وانا بكتب الكلام ده نيهاا، يمكن هلوسة السخونية، وحرب تكسير العظام الي بمر بيها، النزلات المعوية التي لا تفارقني رغم اني مابقتش آكل أصلا، الغرفة المعتمة تماما الي انا قاعدة فيها بقالي 3 ايام، والغيــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــاب

خلاني أنام وبشكل متواصل في السرير لمدة 55 ساعة

وده رقم كبيييييييييييييييييييييييييييييييييير اوي

لذا انا محتاجة حبة عشان أدرك الفرق بين ما كان حلم وكان واقعا

كل الي أنا عارفاة اني اقتنصت الفرصة الي قادرة اقوم فيها من السرير، وبالطبع كل آل البيت نائمييييييييييييييين عشان اتشك علي الناس وعلي ايميلي ..تقولوش مستنية ايميل من الـ bbc مثلا ..ما علينا

من بين كلفته البطانية التي لا تظهر سوي عدسات نضارتي وتخرج من بينها اديا لكي تطقطق ع الكيبورد ..أكتب .

انا شوفتك كتير اوي خلال فترة نومي..كتير كتير كتييييييير اوي يعني

مرات منها لحظات خاطفة ..زي البرق بيروح ويجي

ومرات ..كنت واضح اوي ..زي الشمس كده ..بتفضل مونساني طول اليوم

اعدت تحكي لي علي حاجات انا مش فاهماها ..بس انا فاكرها ..انا مفهمتهاش لأني مكنتش مركزة معاك ..

كل الي كنت مركزة فيه انك موجود ..فعلا ..حقيقي ..بجد ..وكل الي كنت بقوله في بالي

انا كنت فاكرة اني مش هشوفك عمري تاني

خدتني من ادياا زي العيلة الصغيرة وخرجتني بره الاوضة الضلمة الي أنا قاعدة فيها ..وودتني المطبخ..رغم انك ما بتحبش حد يقف معاك فيه ..بس وقفتني معاك وعملت لي ( نعناع بالبينسون) ازاي ..معنديش فكرة

ورجعتني الاوضة تاني ..وقعدت جمبي تحكي لي حكايات ...(ممكن محدش يترييييييييييق ) ، ايوة حكالي حكايات ..انتوا مالكوا انتوا

وقولت لي تصبحي علي ...

وصحيت ..

ولقيت جمبي كوباية فاضية فيها بقايا نعناع وينسون في الآخر ، أسأل بابا/ماما/ محمود " مين الي عمل البتاع ده ليا"؟

الرد يكون : " معنديش فكرة "، لحد ما أسماء جت وسألتها ..

وقالت لي نصاً: انتي قمتي بالليل دخلتي المطبخ، عملتي لنفسك كوباية نعناع بالينسون ومدرتيش علي ولا كلمة من الي قولتهالك نظراً لأنك كنتي نااااااااااااااااااااااااااااااااااااااااااااااااااااااايمة "!!!!!!!!!!!!!!!!!!!!!!!

قد ايه احنا أنانيين، وعاوزين نكون علي طول مبسوطين، وبنحمل الآخرين سبب تعاستنا او سعادتنا

قد ايه ممكن لحظات غياب بتنسينا الاوقات الجميلة الي قضناها مع الناس الي بنحبهم اوي، ونبدأ نتهمهم انهم متخاذلين

بجد ..

لازم نكون علي درجة من العرفان بالجميل للناس الي وهبونا لحظات سعيدة ، حتي لو قليلة

بالمناسبة ..النعناع والينسون ..ريحيوني شوية

ملاكي الحارس ..شكراً

بس انت عرفت تقول " معلش"

من أسبوع وأنا عاوزة أكتب حاجة..مش عارفة

بحرق في دمي كل يوم بالليل ..وبرضه مش عارفة لحد ما قابلت امبارح ( رانيا منصور ) ..الشاعرة الصؤنونة

حسيت انها قالت كللللللللللللللللللللللل حاجة تقريبا

رانيا..

وانتي بتقولي ( معلش يا زهر ) قدامي امبارح انا كنت هــ(..) بس مسكت نفسي ع الآخر

كان نفسي ألاقي اي حته أداري فيها

محمد كان عنده حق لما قالك ..قولي ( معلش يا زهر ) عشان أميرة تحبك

انا فعلا ..حبيتك

عارف..
ولو انك مش عارف
في طوبة ف روحي بتتفتفت
مِتخَيّل روحي بقت فتافيت؟
مردومة الدنيا عليا عياط
بتنقّط جوا ضلوعي صريخ
فـ باوَطِّي الصوت
بامسك منْديل وَرَقُه مرطّب
وأدعك قلبيـ بِْحكَايات النور وأفضَل اطبطب
“إهدَى.. إهدَى”
وأدعك قلبك.. لساه مغيّم
هينوّر تاني أكيد لازم!
...
وأمسك ورقِةْ سلوفان بِتْوِش
تِتْلفّ ف إيدي وتصبح دايرةْ نور بتضُم
واتمنى انا وانت نكون جواها ف نُص القُطر
نخلّي معانا ديوان نقراه.. وشوية مَيَّة
علشان لو عِطشت جَنّتنا..
نسقيها.. نسقسق نواحيها
بتحب المشي؟ راح الفّ الدنيا على عنيّا
مع اني بقالي كتير باعْيَا
مش حِمل اتمشى ف عالم مزحوم عالآخِر
مابقيتش اتحمّل - بعد ما كِملت ببعادك -
...
طب فاكر يوم ما اتمشينا
ف الزحمة يوميها تعبت ازاي؟
حبيت من قلبَك “تعبانة؟”
“أنا.. أبداً.. لأ.. مش أوي يعني!
تعبانة ازاي ؟”
وف سِري “ازاي وانت معايا؟”
باتحجج كنت
وكنت باقول.. ماههونش عليك
هتهون مسافتنا الشاردة ف صَحْرا الناس
وتكش كأن ما بينّا مفيش
أستِك مشدود ورجع للعادي
صَبَحت قريّب من تاني
...
فاكِر..
- ولو انك مش فاكر -
الضحكة الكانت مفروشة
على وِشي زمان لمّا عرفتك
الحاجة الواحدة اللي بتِعلَى و باعْلَى معاها
كانت يعني!
(وانا كُنت كمان)
دلوقتي بتخرُج مجروشة
وبيفْضَل حزني عليك سجّان
...
بيقولوا الغوص تمرين للقلب على الغيبة
ما حاولت أتنفس من كام بَحر ومعرفتش
مش عارفة أتعود ع المية
الميّة بتوجع.. حساها..
لما أتلقاها ومانتاش جنبي تعلّمها تحنّ عليا
والغيم أشباح..
مليانة الأوضة كتير بالغيم - والغيم أشباح –
مانتاش ويايا عشان تِحرَقهم بانفاسَك
مبحبش لون تبخير الدنيا.. بتصبح بيضا كمان بالكدب
وانا قلبي ده حبّك -مش بالكدب-
بس انت عرفت تقول “معلش”
...
لو عارف - طبعا مش عارف -
لو عارف ان الكلمة دي وِش
مرشوش بالغِش
بتخلي القلب الكان مرتاح
بيدق بسرعة طلْق النار..
بس مابيموتش
...
فيا بَحة صوتي اتهدي خلاص
الخنقة وكسْرة نفسك شيء
والعالم شيء
كان نفسي أموت والفرحة ف بُقي ومابلعهاش.. بس أدوقها
شديتها وهي على شفايفي.. من غير ما ألْحَق!
فـ أضحك !
وكأن الحزن خلاص شطّب
وباهزر حتى ولسه الروح عمّالة تنز
وكأن الطوب في الأرض بيفهم ضِحكي أكتر منك..
فيزق أقدامي عشان محروقة وصبحت مصدر دم وهم
عمّالة تلزّق ف الماشيين
فـ أتحرك بردو ومن غير نِفس
واتشد كأني شريط بيسِف..
مش فاهم حاجة لكن شغال
...
باستنى اليوم اللي يفكّوني كلام مفهوم
ويقولوا غريبة صبَح له لزوم
وانا اقول معلش
خبوني عشان جوايا اتمزّع ع الآخر
- بقى شكلي وِحِش - !
مكسوفة من الوش المزحوم
بملامح فاضية
وقلب اتشقق كله خروم
كان فاكر يوم هيجيله البِشر
معلش يا زهر : )
معلش..

كل ده كان ..ليه؟

مية سؤال وسؤال ولا فيش إجابات