Wednesday, October 17, 2007

وجب الحب علينا ****

الفترة الي فاتت كنت بمر بأمراض اجتماعية ظريفة جدا ..منها أني قال ايه عاوزة أكتفي بدايرة علاقاتي علي كده ومعدتش عاوزة أعرف حد تاني ..يمكن السبب إن أخطائي في حق البشر بتخليني أخاف أعرف حد عشان ما اجرحهوش في يوم ..يمكن أكتر أخطاء البشر في حقنا والي بتوصلنا لمرحلة اننا نحس ان ضهورنا مبقاش فيها مكان لطعنات جديدة.

ولكن لأن وجهه النظر دي غلط أساساً وملهاش أي أساس من المنطق ..فربنا دايما " بيوقف لنا ولاد الحلال" الي يخلونا نتخلي عن نظريتنا الي مبينة علي أساس آلامنا .
تجربتي مع إسلام أونلاين بالنسبة لي " تجربة إنسانية " بالاساس قبل ما تكون فترة تدريب استفدت منها كتير ..الأسبوعين دول بقي غيروا قراري بعدم توسيع دايرة علاقاتي ..الي فتح باب القلب علي مصرعية والي يحصل يحصل

بعد ما تدخل من الباب وعلي بعد حوالي 4 خطوات تحديدا تجد المدعوة " نرمين " ..اعتدت علي اصطباحتك ليا وانتي بتطلعي لي لسانك ع الصبح ..وانتي بتقولي أهلا انتي ايه الي جابك ؟..رغم جفاءك المصطنع بس أنا بحبك اوي وبحب اصطباحتك كمان والكام يوم الي مشفتكيش فيهم أضايقت اوي.."نرمو"..أنا بحب أبو تريكه والاهلي وكل ما هو أحمر اللون عشان خاطرك .
هتمشي خطوتين تلات خطوات هتلاقي مكتب " وحدة العلاقات الخارجية الثقافية" ..مكان تدريبي في إسلام اونلاين..هتفتح المكتب هتلاقي 3 شخصيات
1.دكتور نادية علي ايدك اليمين منهمكة تماما فيما بتكتبه لدرجه انها ممكن تبص لك وتتكلم معاك وهي اديها لسه ع الكيبورد وبتكتب، دكتور نادية ..مش هنسي ضحكتك وانتي بتسلمي عليا..ساعات كنت بحس انك بتحضنيني بيها..علمتيني يعني ايه انك تكون بشوش في وجوه البشر في اشد اللحظات زحاماً وكركبةً . وسعيييييييدة جدا أنك شايفة اني حد كويس مهنيا ويارب أكون كده فعلا .

2. دكتور مجدي في النص :احتكاكي بدكتور مجدي كان ضئيل اوي لكن هو شخصية وقورة اوي وليها هيبة ..ساعات كنت بوطي صوتي أوي وانا بتكلم معاه لأنه كان بيبص لي بصه غريبة ..بعد كده اكتشفت ان دي نظرته أساساً، كنت بخاف أضحك بصوت عالي لأحسن تضايق يا دكتور وتكتشف حقيقة اني شخصية مزعجة جدا، كنت بستغرب لما خباب او ايمان عبد المنعم يدخلوا ويتكلموا بصوت عالي شوية ..وأسأل نفسي هما مش شايفين ان دكتور مجدي قاعد بيشتغل، لما كنت بتضحك معايا كنت بحس اني عملت انجاز ..الفكرة اني اكتشفت ان الهواجس دي ملهاش أي لازمه نيهاا لأني كنت غبية لما لمست وقارك وهيبتك قبل ما ألمس طيبتك .

3. خباب عبد المقصود في آخر زوايا المكتب: خباب بجد مش عارفة أكتب ايه، يمكن لأن مشاعري لما بتتحول لحروف أحيانا بتخرج من مضمونها، اتمني انك تكون عارف أنا بحبك قد ايه، واخوتك واخدة مساحة عندي قد ايه ..فاكر اليوم الي سألتك فيه انت ليه كده؟!! كنت غبية لأني مكنتش أعرف معني " أخويا الي مجبهوش أمي ولا ابويا" زي ما انت علمتهوني . ربنا يخليلك حبيبة ياااااااااااااارب

كعادتي كل يوم اول ما بصبح علي الـ 3 السابق ذكرهم فوق كنت بحط الشنطة وأخرج أصبح علي بقية البشر ..لأن مكتب موقع عشرينات في نفس المكان وانا عشرينات دول بقي أهلي وناسي
أول ما كتبت حاجة تنزل كانت هناك واول ما بدأت أحس مسؤلية حاجة تتكتب كانت هناك ..عشرينات بقي يضم الكثير والكثير

مصعبوف: او عبقرينو او مصاعيبو ..أو مستر بصرة نيهاا، مصعب هو حامي حمي ديار عشرينات من الكوراث التقنة ..الله يعنيه بجد..مستر بصرة دي جت نتيجة اننا لما بقينا نقول نفس الكلام في نفس ذات الوقت كتير اووووي
أعتدت منك صديقي الجديد اني لما أكتب (..) بتفهمني من غير ما اوضح مهما كان سياق الحديث ..لذا سأكتفي بهاتين النقطين مع إضافة معادلة الورد اللانهائية والي وعدت نفسي أنها هتكون حصرياً ..لك وحدك
while(1) {
echo " (f) * 10 ^ 9 ";
}

مروة صلاح: زميلة الكلية العزيزة ..ومصدر الآمان ليا في عشرينات ..وجودك في المكان بيديني إحساس بالطمأنينة غريب ..لهفتك لما بتشوفيني وسلامك عليا وانتي بتقولي لي " فينك يا بنتي ؟!" وانك كل مرة تقولي لي ما بتبعتيش حاجة ليه بيحسسني ان في أمل انك تلاقي بنات مش منفسنة نيهاا ..مروة متزعليش مني بجد أني كنت هنزل من غير ما أحضر عيد ميلادك ..بجد أحبك في الله

مني سليم : انتي رقيقة أوي يا مني ..أوي بجد وحنينة كمان..فاكرة ملف اليسارية الي كنا هنعمله في عشرينات والي وقفنا عنه الحرب علي لبنان ..بجد نفسي أشتغل معاكي .
شيرين مجدي : دي بقه حته سكره فعلا ..فعلا فعلا يعني، ماشاء الله عليها ..عندها قدرة انها ترفع معنويات أي حد وبضحكة بسيطة او هزارة خفيفة ..شخصية ظريفة أوي ..ده الي جانب اني بحبها أوي لأنها كل ما بتشوفني بتقولي " ايه الشياكة دي؟" نيهاا

أحمد هواري : كل الي بينا صباح الخير ..صباح النور ..كل سنة وانتي طيبة ..وانت طيب نيهاا بس هو طيووووووب خالص، هواري انت متتصورش فرحت ازاى لما المطر مطر وكلمتني ع النت وده شئ مش متوقع عشان تقولي ان المنظر بره ممكن يعجبك ..لولاك كنت هفوت حاجة بستناها فصول ..موشكرين يا فندم

كده شباب عشرينات خلصوا أعتقد
بس في حد جميل أوووي، اتكعبلت فيه في فترة تدريب آلا وهو

أحمد رفعت : أولاً مليون ألف سلامة علي رقبتك الي اتلوحت، ثانيا ربنا يزيد انسانيتك كمان وكمان وتفضل تهتم بالبشر وتحسسهم ان مازال هناك أمل في الدنيا ..وان مسير الواحد ممكن يلاقي ضهر يتسند عليه ، ربنا يخلي لك داليا ويتمم لكم علي خير

أنا بجد بحبكم أوي .. اتفرجوا بقي ع السلايد ده.. ليركس الأغنية هنا




ــــــــــــــــــــــــــــــــــــــــــــــــــ
*****اسم التدوينة مقتبس من إسم تدوينة لأحمد رفعت ..وهذا لمراعاة حقوق الملكية يا عم أحمد .

8 comments :

  1. مصـ( الخير )ـعب said...

    مسز بصرة..
    بجد بجد مش عارف أقول لك ايه..

    while(1) {
    echo " .. * 10 ^ 9 ";
    }

  2. Dina Samaha said...

    ياااه انتى جبتى كل الناس اللى اعرفها بس هما حوالى 12 ا13 واحد بس منهم معرفهوش

    :D

    لا انا فعلا معرفش غير مروة صلاح شخصيا واكيد الباشا الكبير خباب

    واحمد رفعت بس شوفته يوم المؤتمر وكان شخصية لذيذة جدا

    متعرفيش قد ايه يا اميرة انا فعلا مبسوطة بدايرتك الجديدة والجميلة اللى يارب تدوم عليكى

    ايوه كده يابنتى افتحى باب قلبك على مصرعيه ..ليوقع حد تانى بالمرة هههههههههههههه


    *الاغنية روعة

  3. mohamed said...

    طبعاً كنتي غلطانه وش يا أميرة

    وادي أتعرفتي بناس أنسانه أوي

    زي أيمان عبد المنعم ومروة صلاح مينفعش يكتئب ولا يقفل علي نفسه ودول موجودين وبسال نفسي هما أزي كدا وليه كدا

    ولا بيبو أبو بيبه (خباب)اللي مش عايز يجوزني بنته شكله خايف لاكون طمعان في ثروته اللي لسه مجمعهاش

    وأحمد رفعت عين أعيان كلية تجارة انا فاكر من زمن سحيق لما اتعرفت عليه اول مرة في مركب في النيل

    والعزيز مصعب ولقائي بيه قبل احداث 31 أغسطس

    وبقيت الناس

    ايوا كدا يا أميرة علي راي محمد منير دور علي الناس في قلوب الناس

    والحمد لله انتي بدائتي تلاقيهم

  4. dead man said...

    يافندم ده شرف لينا ان اسمى جه هنا .. وبعدين يوم المطر ده يوم غريب .. انا كنت سايب الكمبيوتر وواقف في الشباك بتفرج ومبسوط وبشرب سجاير واخر اندماج علي الرغم من كل اللى حواليا صوت الرعد والبرق كان مخليهم "قلبهم مقبوض" بس انا كنت مبسوط وقررات انى اقول للناس كلها تطلع تتفرج ..

    وموضوع ان اللى بينا السلام عليكم وصباح الخير ده في الغالي غلطتى .. علشان انتى اكيد شايفة ان انا مش اجتماعى

    فمعلش بأه .. بس بجد والله فرحت لما قريت اسمى هنا

  5. احمد رفعت said...

    أميرة يعني ميرو يعني حاجات كتير اوي مضروبه في بعض على رأي علاء ولى الدين يا سلام على الكوكتيل الجميل ....

    أميرة يعني عرفتك في يومين وبقينا صحاب أوي وبرخم عليكي في الريحه والجايه ...

    أميرة يعني ابتسامة حلوة من ورا الازاز كل يوم ..


    أميرة بجد بوستك أثر فيا أوي ...


    بجد انت أنسان رائع وجميل ويارب يسعد قلبك الكبير واسمحيلى اضيف بوستك في خانه بوستات أثرت فيا على مدونتي ..

    أميرة تصبحي على خير

  6. Amira Qassim said...

    Mr Basra :))) ( Mosab)
    Friends..never explain, what are friends for so ?

    Dina
    (F)

    Mohamed
    الحمد لله فعلا

  7. Amira Qassim said...

    أحمد رفعت :

    تعليقك أبهجني :D

  8. الحشرى said...

    تصدقى يا أميرة والله حبيتهم من حلال كتابتك عنهم ونفسى بصدق أتعرف بالناس الحلوة دية ربنا يبارك فيكى وفيهم