Friday, October 12, 2007

فرحة العيد ..وسعد نبيهة :D


أهلا ..أهلا بالعيد ..مرحب ..مرحب بالعيد ,وهييييه ، هيييييه ..هييييييه

يا نهار أبيض ع الاغنية دي وذكرايتها معايا

كبيرة ولا صغيرة

فعلا أغنية معششة جوايا بزيادة أوي

زمان كنت بحسب ان الاغنية دي بتاعة عيد الفطر بس ..ومينفعش تتغني في عيد الأضحي، ودايما شكلها في دماغي بلالين ..

لما كبرت شوية ..كنت بعتبرها أفضل الاغاني بتاعة العيد وان العيد الي ما يتسمعش فيه الاغنية دي يبقي مش عيد

لحد ما كبرت شويتين ونسيتها

جت مي بعبقريتها الشديدة وفكرتني بيها بس بأجمد ذكري ممكن تتخيلها

مي ببراءة الاطفال جت مرة قبل عيد من الاعياد تسألنا ...هو مين " سعد نبيهة " الي بتغني له صفاء أبو السعود في أغنية " أهلا بالعيد"

طبعا كلنا وقعنا تحت الطربيزة م الضحك

الاغنية بتقول

للعيد فرحة ..سعدنا بيها..بيخليها ..ذكرى جميلة لبعد العيد

مي بقي جابت منين عم " سعد نبيهة" في الاغنية ..متعرفش

غالبا خلل وظيفي في الاذن عندها

ومرت 3 سنين ..نسيت الاغنية تاني

آآآلاقي مين يفكرني بيها بقي

مهند ..العزيز جدا

وقال ايه ..صفاء أبو السعود بتغني له

نظراً لأن مهند الدلع بتاعه" هنو" فهو من زمااااان أوي وهو فاكر انها بتغني له هو شخصيا



" بركوا وهنوا ..سوا واتمنوا ..كل العالم يبقي سعيد "

مش عارف لما هنساها وحد هيجي يفكرني بالاغنية دي ..هيفكرني بيها ازاى

الغريب ان كلها ذكريات " فهم خاطئ "

كل سنة وانتوا طيبين


11 comments :

  1. Mai Kamel said...

    عشان تعرفي يا اميرة انك مصاحبة عاهات
    هههههههههههههههههههههههههههههه
    عامة انتي بتسالي مين سعد نبيهه
    سعد ابن الحاجة نبيهه ده اشهر من النار ع العلم
    هبقى اعرفك عليه بعدين
    :P

    البوست لطيف جدا يا توتة
    كل سنة وانتي طيبة

  2. Dina Samaha said...

    :D
    تحفة اوى سعد نبيهة ده

    فكرتينى يا اميرة وانا صغيرة برضه كان فيه اغنية تانية للعيد
    اللى هى اغنية " العيد فرحة" وكورال الاطفال يرد" يا سلاااااااام"
    واجمل فرحة..يا سلااااااام

    انا كنت بقول هما الاطفال مش مصدقين ليه انها فرحة ياترى هما مش بيقضوا العيد زينا ولا ايه
    ولا هما بيكدبوا اللى بتغنى

    :D

    كل سنة وانتى طيبة يا حبيبة قلبى
    (F)

  3. Anonymous said...

    ها ها ها ها
    كل سنة وانتي طيبة يا اميرة وعيد سعيد عليكي وعلي كل اصحابك
    والف مبروك علي البلوج .. هي ممكن تكون من فترة بس انا لسة شايفها النهاردة
    بالتوفيق يا جيفارا وعقبال العيد الجاي لما ييجي وانتي محققة كل طموحاتك واحلامك
    يالا .... تصبحي علي خير
    إمام........................

  4. mohamed said...

    :D

    امبارح كنت بفتكر الأغنية دي وافتكر لما كنت ارجع من صلاة العيد وألقيها شغاله في التلفيزون وبعدها يجي مسرحية مملة تخلي الواحد ينام غصب عنه لحد معاد الأكل

    وافتكرت حاجات كتير زي ما مي قالت عاهات كدا

    كل الذكريات فهم خاطئ ..مش مهم بس الخطأ دا جميل وعمره ما كان فحد بالعكس كان في منتهى البرأه

    كل سنة وأنتي طيبة يا أميرة ..

    تقبل الله منا منكم
    (F)

  5. مُصْعَب إِبْرَاهِيم said...

    لما تنسي هآجي أفكرك "هم عرفوا منين إن عمي الكبير امه سعيد؟" :P

    ماشي على الندالة .. بوست جديد من غير لينك يتبعت ولا أي حاجة

    كل سنة وانتي طيبة

  6. مـهـنـد said...

    على فكرة أنا كمان كنت زى مى بحسبها بتقول سعد نبيهة، لأن كلمات الأغنية والطريقة اللى بتغنيها بيها صفاء أم السعود صعبة على طفل إنه يفهمها، ولو لاحظتى إن كل أغانى الأطفال زمان كانت كده.. صعبة الفهم وفيها كلمات مكانش حد من الأطفال بيفهمها.
    ولو حاولتى تفتكرى كلمات أغنية أطفال قديمة مع أى حد هتلاقيكى فاكرة الكلمات اللى هو فاكرها ومش فاكرة الكلمات اللى هو مش فاكرها، وده يدل على إن العيب فى الأغانى نفسها مش فى المستمعين.
    على العموم كل سنة وانتى طيبة يا أميرة ومتشكر إنك جبتى سيرتى فى بلوجك الرقيق.. تعيشى وتفتكرى

  7. مـهـنـد said...

    مش ممكن تعليق دينا موتنى من الضحك

  8. قضية عم أحمد Ahmed Case said...

    ههههههههههههههههه

    كل سنة وانت طيبة وانت اسعد

    الف مبروك على البوست الجديد

  9. Amira Qassim said...

    أنا فعلا اكتشفت أني مصاحبة عاهات ..وكلها عاهات ذهنية والحمد لله

    كل سنة وانتوا طيبين كلكم

  10. Amira Qassim said...

    Dina
    نسيت أقولك ان الاغنية الي انتي بتتكلمي عنها ..هي هي الي انا بتكلم عنها

  11. Anonymous said...

    السلام عليكم
    أعتقد انه حدث بيننا توارد فى الأفكار
    فقد كتبت أنا أيضآ موضوع عن الأستاذ سعد نبيهه وحينما قمت بجوله بين المدونات وجدت موضوعك وقد أعجبنى
    وعليه أدعوك الى زيارة مدونتى وقراءة الموضوع على اللنك التالى
    http://alghali68.blogspot.com/
    أعتذر لأنى لم أنشر مدونتى على محركات البحث حتى الأن وأرجوا لك مزيدآ من التوفيق