و يشتهيني الاكتئاب

كل يوم بالليل نفس الموال!
الاول الموضوع كان بيعدي ...نص ساعة ارق ..خلاص يا عمنا ما إحنا بنام قد كده ماجراش حاجة لما الواحد يعد نص ساعة علي السرير

وهو مش عارف ينام

وهو بيتقلب من الناحية دي للناحية دي

...
طب هنعمل ايه في النص ساعة دي بقي

آآآآآآه ...فاضي !! طب تعالي فكر في نفسك كده شوية
انت هببت ايه النهاردة ؟؟
عملت ايه في يومك كده واحكي لي
مرة واحدة تلاقي كل الهواجس الي زنقت بيها الدنيا مشرفاك في النص ساعة دي ...تقدر تفلت ...

لا يا حلو وعلي رأي المثل ..

جالك الهاجس يا تارك ....
تارك ايه ؟؟
الا هو انا تاركة ايه ؟
شغلي الي ماليش نفس اروحه
ولا قلمي الي مش قادرة امسكة واكتب حاجة عليها القيمة .ارضي انا عنها قبل أي حد تاني
ولا قضية حياتي الي ركانها علي جمب لحد ما التراب غطي عليها ونام
ولا مشروع تخرجي الي تقريبا اتخنقت منه ،
ولا صحابي الى حاسه ان المسافة بينا بتوسع
ولا سفري الي مش عاوز يجي ويخلصني من الهم الي انا فيه
ولا الله الي بقالي كتير ما حكتلوش ولا شكيتلوش ...
المشكلة اني بحس ان شكاوايا اصغر واتفه واحقر من اني اعد اتكلم معاه فيها !!
بعد هذا الكم من القرف ، والشعور بأن الحياة مالهاش لازمه ( بمعني اصح اني انا الي ماليش لازمة )
ساعتها ببقي متأكد ان دي اعراض اكتئاب...
واني لازم اتخطي الموقف واخرج من الحالة المهببة الي مش عاوزة تنتهي دي
ساعتها بحس بجد اني نفسي اصررررررررررررررررررررررررررررخ
أصررررررررررررررررررررررررررررررررخ من هنا لبكرة
لحد ما يتنبح صوتي
والاقيني فعلا بصرخ ، صرخة من جوه اوي ، بس مكتومة اوي
تكسر في ضلوعي ، وترجع تلملمها تاني
وتصدع دماغي واروح في انوم ...
ويجي اليوم الي بعديه .....نفس الموال !!!